Ата-анаға өтініш үлгілері
Қазақстан Республикасы
Білім және ғылым министрінің
2007 жылғы 25 желтоқсандағы
N 651 бұйрығымен бекітілген
Бастауыш, негізгі орта және жалпы орта білімнің жалпы орта білім беретін білім беру оқу бағдарламаларын іске асыратын білім беру ұйымдарына қабылдаудың үлгі ережесі 1. Жалпы ережелер
1. Осы ереже "Білім туралы" Қазақстан Республикасы заңының 26-бабы 2-тармағына сәйкес әзірленді және меншік нысанына және ведомстволық-бағыныстылығына қарамастан бастауыш, негізгі орта, жалпы орта білім берудің (бұдан әрі - ұйым) оқу бағдарламаларын іске асыратын білім беру ұйымдарына қабылдаудың тәртібін айқындайды.
2. Ұйым қызметін Қазақстан Республикасының Конституциясына, заңдарына, Қазақстан Республикасының өзге де нормативтік құқықтық актілеріне, сондай-ақ білім беру ұйымдарының қызметін реттейтін, бастауыш, негізгі орта, жалпы орта білім берудің оқу бағдарламаларын іске асыратын және олардың жарғысының негізінде әзірленген нормативтік құқықтық актілерге сәйкес жүзеге асырады.
2. Бастауыш білім беру ұйымына қабылдау тәртібі
3. Қазақстан Республикасының жалпыға білім беретін білім беру ұйымдарының бірінші сыныптарына даярлық деңгейіне қарамастан ағымдағы жылдың 1 қыркүйегіне дейін 6 жасқа толған балалар қабылданады.
Бастауыш білім беру ұйымының бірінші сыныбына баратын балалардың ата-аналарынан (заңды өкілдерінен) өтініш қабылдау ағымдағы жылдың 1 маусым - 30 тамыз аралығында жүргізіледі.
Бірінші сыныпқа балаларды қабылдау үшін мынадай құжаттар қажет:
ата-аналарынан (заңды өкілдерінен) өтініш;
баланың туу туралы куәлігінің көшірмесі;
денсаулық жағдайы туралы анықтама (медициналық паспорт);
тұратын жерінен анықтама немесе тұратын жерін растайтын басқа құжат;
3x4 фото - 2 дана.
4. Бастауыш білімнің жалпы білім беретін оқу бағдарламаларын іске асыратын білім беру ұйымдарына білім алушыларды қабылдау кезінде басшылар оқуға келушілерді, олардың ата-аналарын (өзге де заңды өкілдерін) қабылдау тәртібімен, жарлықпен және білім беру үдерісін ұйымдастыруды реттейтін басқа да құжаттармен таныстыруға міндетті.
5. Қызмет көрсететін аумақта тұратын балаларға жеке меншік білім беру ұйымдарынан басқа тиісті білім беру ұйымына қабылдаудан бас тартылмау керек.
6. Бастауыш білімнің жалпы білім беретін оқу бағдарламаларын іске асыратын білім беру ұйымының бірінші сыныбына қабылдау кезінде емтихандар, тестілеулер, сынақтар, конкурстар жүргізілмейді.
Мектепке дейінгі мекемелерде болмаған, мектеп алды даярлығынан өтпеген балалар үшін оқу жылы басталғанға дейін даярлық курстары ұйымдастырылады.
7. Білім алушылар қатарына қабылдау білім беру ұйымы басшысының бұйрығы негізінде жүргізіледі.
Білім беру ұйымы қызмет көрсететін аумақта (шағын ауданда) тұратын 6 жастағы балалардың саны туралы статистикалық деректердің, денсаулық жағдайының негізінде бірінші сыныптар желісін қалыптастырады.
8. Сыныптарды даярлық деңгейі және даму дәрежесі бойынша жасақтауға рұқсат етілмейді.
Сыныптағы шекті сыйымдылық 25 білім алушыдан аспайды.
3. Негізгі орта білім беру ұйымына қабылдау тәртібі
9. Бастауыш білім беру деңгейін аяқтаған, негізгі орта білімнің оқу бағдарламаларын іске асыратын білім беру ұйымдарының бесінші-тоғызыншы сыныптарына қабылдауды педагог қызметкерлер жүзеге асырады және ата-аналардың немесе өзге де заңды өкілдердің мүдделерін ескере отырып берілген ұйымға бекітілген аумақта тұратын барлық азаматтардың қол жетімділігін қамтамасыз етеді.
10. Ақылы білім беру қызметін іске асыратын жеке меншік ұйымдарда негізгі орта білімнің оқу бағдарламаларын іске асыратын білім беру ұйымдарының бесінші-тоғызыншы сыныптарына қабылдау білім беру үдерісінің субъектілері арасындағы білім беру саласындағы уәкілетті орган бекіткен шарттармен реттеледі.
11. Орнын толтыра оқытатын бесінші-тоғызыншы сыныптарға қабылдау, даму мүмкіндігі шектеулі балаларды жалпы оқу-тәрбие үдерісіне қосу, олардың білім алуы үшін жағдайлар жасау білім беруді басқаратын жергілікті органдардың келісімі бойынша ата-аналардың (өзге де заңды өкілдердің) келісімі кезіндегі бар көрсеткіштері ескеріле отырып жүзеге асырылады.
4. Жалпы орта білім беретін жалпы білім беру оқу бағдарламаларын іске асыратын білім беру ұйымдарына қабылдау тәртібі
12. Кәсіптік мектептің оныншы-он бірінші сыныбына қабылдау білім алушының жеке өтініші немесе ата-анасының (өзге де заңды өкілдің) өтініші негізінде оқытудың бейінін таңдау кезінде білім алушының мүддесін, бейімі мен қабілетін және білім алушының тұратын аумағын ескерместен негізгі орта білім деңгейі туралы мемлекеттік үлгідегі құжатының бар екендігін ескере отырып жүзеге асырылады.
Өтініштерді қабылдау негізгі орта білім беру деңгейі туралы мемлекеттік үлгідегі құжатты бергеннен кейін басталады.
13. Гимназияның, лицейдің оныншы-он бірінші сыныбына қабылдау Қазақстан Республикасының лицейлерінің және гимназияларының қызметін реттейтін нормативтік құқықтық актілерге, гимназияның жарғысына сәйкес білім алушының жеке өтініші немесе ата-анасының (өзге де заңды өкілдің) өтініші негізінде және білім алушының тұратын аумағын ескерместен негізгі орта білім деңгейі туралы мемлекеттік үлгідегі құжаты бар болғанда жүзеге асырылады.
14. Білім алушыларға, ата-аналарға (өзге де заңды өкілдерге) қабылдау ережесімен, білім беру ұйымының жарғысымен, білім беру қызметін жүргізу құқығына берілетін лицензиямен, жалпы орта білім беретін білім беру оқу бағдарламаларын іске асыратын білім беру ұйымына қабылдау тәртібімен, білім беру ұйымының қызметін реттейтін басқа да құжаттармен танысу мүмкіндігі ұсынылуы керек.
15. Ақылы білім беру қызметтерін іске асыратын жеке меншік ұйымдарда білім алушылардың, олардың ата-аналарының (өзге де заңды өкілдерінің) өзара қарым-қатынастары оқу мерзімін, оқуға төленетін төлемнің мөлшерін, өзге де талаптарды айқындайтын білім беру саласындағы уәкілетті орган бекіткен шарттармен реттеледі.
16. Жалпы орта білім беретін білім беру оқу бағдарламаларын іске асыратын білім беру ұйымының оныншы-он бірінші сыныбына қабылдаудан бас тартылған жағдайда жалпы орта білім беретін білім беру оқу бағдарламаларын іске асыратын білім беру ұйымын бітіруші және (немесе) оның ата-анасы (өзге де заңды өкілдері) білім беру саласындағы жергілікті атқарушы органға шағымдануына болады.
5. Дарынды балаларға арналған мамандандырылған білім беру ұйымдарына (қазақ-түрік лицейлеріне) қабылдау ерекшеліктері
Ескерту. Үлгі ереже 5-тараумен толықтырылды - ҚР Білім және ғылым министрдің м.а 2010.07.28 N 399 (қолданысқа енгізілу тәртібін 4-т. қараңыз) Бұйрығымен.
17. Дарынды балаларға арналған мамандандырылған білім беру ұйымдарына (қазақ-түрік лицейлеріне) (бұдан әрі - ҚТЛ) алтыншы сыныпты бітірген балаларды қабылдау конкурстық негізде түсу емтихандарының нәтижесі бойынша жүзеге асырылады. ҚТЛ басшылары оқуға түсушілерді, олардың ата-аналарын немесе өзге де заңды өкілдерін қабылдау ережелерімен, жарғымен және ҚТЛ-де білім беру процесінің ұйымдастырылуын реттейтін басқа да құжаттармен таныстыруы қажет.
18. Оқушыларды қабылдауды ұйымдастыру және түсу емтихандарын өткізу мақсатында Қазақстан Республикасы Білім және ғылым министірлігімен 2003 жылғы 17 наурызда Астана қаласында жасалған «Қазақстан Республикасындағы қазақ-түрік оқу орындарының білім беру саласындағы ынтымақтастығы туралы келісім» шеңберінде әрекет ететін «KATEV» Халықаралық Қоғамдық Қоры құрған орталық қабылдау комиссиясы жасақталады.
19. Жергілікті жерлерде түсу емтихандарын өткізу және емтихан парақтарын орталық қабылдау комиссиясына жіберу үшін ҚТЛ басшылары үш педагогтен тұратын жергілікті қабылдау комиссиясын құрады.
20. ҚТЛ-ге түсу емтихандары екі кезеңнен тұрады:
бірінші кезең – тестілеу нысанында өткізіледі және жетінші сыныпқа дейінгі математика курсы бойынша бағдарламалық материалдардан және логика бойынша сұрақтардан тұрады. Сұрақтардың жалпы саны - 60. Тестілеу оқушының таңдауы бойынша қазақ немесе орыс тілдерінде өткізіледі. Тестілеуге 1 сағат 40 минут беріледі.
екінші кезең – психологиялық–талдамалық тест. Түсу емтихандарының екінші кезеңінде оқушылар ҚТЛ интернаттарында 5-8 күн тұрады және олардың ұжымдық ортаға бейімделуін тексеретін және оқу материалын қабылдау деңгейін анықтайтын математика, қазақ, түрік және ағылшын тілдері бойынша курстарға қатысады.
21. Жергілікті комиссия бірінші кезеңнің қорытындылары бойынша тестілеу нәтижелерін конкурс (рейтинг) бойынша ең жоғарғы балл жинаған екінші кезеңге өтетін оқушылардың санын анықтайтын орталық қабылдау комиссиясына жібереді.
Бір сыныпты (25 адам) жинау кезінде екінші кезеңге 40-тан аспайтын оқушы шақырылады, ал екі (50 адам) немесе үш (75 адам) сынып жинау кезінде екінші кезеңге тиісінше 80-нен немесе 120-дан аспайтын оқушы шақырылады.
Екінші кезеңнің қорытындылары бойынша жергілікті комиссия әр сынып үшін хаттама жазып, оларды қабылдау туралы шешім шығару үшін орталық қабылдау комиссиясына жібереді.
22. Әрбір кезеңнің нәтижесі олар өткізілгеннен кейін он бес күнтізбелік күн өткен соң жарияланады. Қабылданған шешіммен келіспеген жағдайда оқушы апелляцияға бере алады. Апелляция нәтижелер жарияланғаннан кейін төрт күнтізбелік күн ішінде беріледі және апелляциялық комиссиямен қаралады.
23. Түсу емтихандарының қорытындылары бойынша орталық қабылдау комиссиясы лицейге ең жоғары балл жинаған және ҚТЛ басшыларының бұйрықтарымен бекітілген ҚТЛ-ге қабылдау құқығына ие болған оқушылар тізімін жолдайды.